Адамзат тарихында орны толмас қайғы-қасірет әкелген, 1418 күн мен түнге созылған қан-құйлы Екінші дүниежүзілік соғыстың аяқталғанына биыл 74 жыл толды. Осынау Жеңіс көктемін жер бетіндегі бейбітшілікті аңсаған барша халық ерекше ықыласпен, зор дайындықпен қарсы алатыны анық.
Ұлы Жеңіс мерекесі Талғар топырағында үлкен ұйымшылдықпен аталып өтті. Отты жылдары жауынгерлердің жігерін жанып, рух берген, жеңіске деген сенімдерін шыңдаған әскери әндер әуені шарықтай шырқалып әр көңілге ерекше күй сыйлады. Тақырып аясына сай жабдықталған орталық алаңдағы әсем шатырдың астында омыраулары орден, медальдарға толы соғыстың тірі куәгерлері, «Бәрі де майдан үшін, бәрі де Жеңіс үшін!» деп тылда еңбектің ерен үлгісін көрсеткен тыл еңбеккерлері, Ауған соғысының ардагерлері жайғасқан еді. Желдей ескен уақытқа тоқтау жоқ. Қан майданда жаумен арыстанша арпалысып, туған жерге аман оралған ардагерлердің де қатары мүлдем сиреген. Бүгінде ауданымызда он үш ардагер бар. Денсаулықтары сыр берген асыл қарттарымыздың бірқатары бұл күнгі Жеңіс мерекесіне қатыса да алмады.
Мереке Қазақстан Республикасының Әнұранымен басталды. Салтанатты шараны аудан әкімі Рыскелді Сатбаев ашып, соғыс ардагерлерін, тыл еңбеккерлерін, барша аудан жұртшылығын Жеңіс мерекесімен құттықтап, ізгі тілегін жеткізді. «Ер есімі – ел есінде» деп тегін айтылмаған. Дүйім жұрт қан майданда қаза тапқан есіл ерлердің рухына тағзым етіп, бір минуттық үнсіздікпен еске алды. Жеңіс саябағындағы ескерткіш түбіне гүл шоқтары қойылды. Талғар қаласы қорғаныс істері жөніндегі біріккен бөлімінің бастығы Айдар Болатұлы, жастар атынан ТАжМК студенті Әнуарбек Өтепов ізгі тілектерін айтып, ардагерлерді құттықтады. Осыдан кейін қан майданда шейіт болған, жалпы соғыс ардагерлерінің ұрпақтарының шеруі соғыс жылдарын ой елегінен өткізетін әдеби-музыкалық композиция, сахналық қойылыммен сабақтасып, үйлесімді көрсетілді. Ел басына күн туған сол бір отты жылдары өрімдей жастардың майданға аттанған сәті, Ұлы Отан соғысындағы теңдесі жоқ ерліктің үлгісін көрсеткен «28 Панфиловшылар» бейнеленген композиция, қазақ халқының қос батыр қыздары мерген Әлия Молдағұлова мен пулеметші Маметованың бейнесі, фашистік концлагерлердегі совет жауынгерлеріне көрсетілген қатыгездікті бейнелейтін көрініс, тыл еңбеккерлерінің жанкешті жұмысы, Рейхстагқа Жеңіс туын тіккен қазақтың батыр ұлы – Рақымжан Қошқырбаевтың бейнесі, қорытынды композицияда сағына жеткен Жеңіс көктемінің қуанышқа толы сәттерін өнерпаздар ән-жырмен, бимен шебер көрсете білді. Мерекенің екінші бөлімі «Құлансаз» фольклорлы-этнографиялық ансамбілінің жеңіс күніне арналған концерттік бағдарламасына ұласты. Сахна төрінен Ұлы Отан соғысы жылдарында жазылған әскери әндермен қатар, Жеңіс күніне арналған, туған жер, Отан тақырыбындағы әсем әндер әуелеп, күмбірлете күй төгілді. Мың бұралған бишілердің толқынды билері де көрермен қауымның көңілінен шығып, тамаша концерттік бағдарламаны Талғар жұртшылығы ұзақ уақыт тамашалады. Соғыс ардагерлері мен тыл еңбеккерлерін аудан әкімдігі кең дастархан басына шақырып, сый-құрметке бөледі.
Бұл күні аудан әкімі Рыскелді Сатбаев, аудан әкімінің орынбасары Дәрменияр Алғатбекұлы 95 жастағы қарт ардагер Қанатай Қамырұлының үйіне барып, құрмет көрсетті. 1945 жылы Жеңіс көктемін Германияда қарсы алған абыз ақсақал І-дәрежелі «Ұлы Отан соғысы» ордені, «Германияны жеңгені үшін» және басқа да жауынгерлік медальдарын омырауына жарқырата таққан. Соғыстан кейінгі бейбіт өмірде де ерен еңбегімен көзге түскен Қанатай ақсақал «Құрмет белгісі» ордені, «Социалистік жарыстың үздігі», «Ауыл шаруашылығының озаты» төсбелгілермен марапатталған. Жауынгерлік жолы, еңбектегі жетістігі жас ұрпақ үшін қашан да үлгі-өнеге екенін жеткізген аудан әкімі, абыз ақсақалға денсаулық тілеп, сый-сияпатын табыс етті, Жеңіс күнімен құттықтады. Өзіне көрсетілген сый-құрметке риза болған ардагер ақ батасын берді.
Райхан Азимова,
«Талғар».
