Мобильді қосымша – ел игілігі үшін

Бүгінде электронды үкіметтің порталын көпшілікке таратуға қатысты, атап айтсақ мемлекеттік органдар мен халыққа қызмет көрсету орталықтарына бармай-ақ, мемлекеттік қызмет түрлерін алудың түрлі тәсілдеріне байланысты нақты жұмыстар атқарылуда. Көрсетілетін мемлекеттік қызмет түрлерінің электронды форматқа ауысуы ең алдымен жемқорлықтың алдын алады. Бүгінде әркім өз уақытының қаншалықты қымбат екенін жақсы біледі. Халық баяғыдай жай бір анықтама үшін халыққа қызмет көрсету орталығына барып, кезекте тұрғысы келмейді. Қоғам алға ілгерілеген сайын «Цифрлық Қазақстан» жобасы да тың идеяларын ұсынып, жаңа бағдарламаларды іске қосып жатыр. Соның бірі – «Телеграмм-бот» және «mGov.kz» мобильді қосымшалары. Бұл қосымша құралы қазіргі таңда халыққа өз пайдасын тигізуде. Азаматтар тек бір рет қана ХҚКО-на келіп, өз жеке сәйкестендіру нөмірін (ИИН) телефон нөміріне «байлап» қойса болды. Одан кейін азаматтар барлық керек анықтамаларын смартфонын ашып, «Телеграмм-бот» немесе «mGov.kz» қосымшасы арқылы ала алады. Қазіргі күні «Телеграмм-ботта» (@EgovKzBot) мемлекеттік қызметтің 24 түрі қолжетімді. Атап айтқанда, мекенжай анықтамасы, зейнетақы, психо және наркодиспансердің анықтамалары, сондай-ақ онлайн-кезектерге тұру, үйге дәрігер шақыру сияқты көптеген қызмет түрлері бар. Ал «mGov.kz» қосымшасында қазір білім беру, отбасы, жылжымайтын мүлік, денсаулық сақтау сияқты салаларға қатысты 90 мемлекеттік қызмет көрсетіледі.

Электронды қызметтер қатарының көбеюімен бірге мемлекеттік корпорация халықтың жалпы цифрлық сауатын арттыруға барын салып жатыр. Аудандық халыққа қызмет көрсету орталығының мамандары ауданымыздағы халық көп шоғырланатын аймақтарда «Телеграмм-бот» және «mGov.kz» мобильді қосымшаларын насихаттап, халыққа түсіндіру жұмыстарын жүргізді. Жуырда 9 мамыр – Жеңіс күні мерекесінде қаламыздың орталық алаңында аудан жұртшылығына аталмыш мобильді қосымшаны смартфондарға жүктеп, қажетті қызмет түрлерін алудың жолдарын көрсетіп, «электрондық үкімет» порталымен мемлекеттік қызметтерді алуды насихаттады. Мамандардың кеңестеріне ынта қойып, жаңа қызмет түрінің тиімділігін түсінген жұртшылықтың қызығушылығы өте жоғары болды.