ХАЛҚЫ СУСЫЗ ҚАЛЫП ҚИНАЛҒАН БЕЛБҰЛАҚ АУЫЛЫНЫҢ ӘКІМДІГІ «ТАЛҒАР ТОПТЫҚ СУ ҚҰБЫРЫ» БІЗДІҢ ӘКІМШІЛІККЕ БАҒЫНЫШТЫ ЕМЕС» ДЕП МӘСЕЛЕНІ ШЕШУДЕН БАСЫН АЛЫП ҚАШЫП ОТЫР

Белбұлақ ауылдық округінде су мәселесі әліге дейін шешілмей тұр. Бір аптадан аса сусыз отырған жұрт ақыры ашуға мініп, әкімдік алдына жиналды. Ол күні ауылдық округ әкімінің қабылдау күні екен. Алайда халық сайлаған Нұрбол Досымбаев та, оның орынбасары да жұмыста болмай шықты. Белгілі болғандай, әкім науқастанып, денсаулығына байланысты демалысқа шығып кеткен екен. Ал орынбасары ауданға жиынға кеткен. Іштегі бірен-саран қызметкерлер жиналған жұртқа өздерінің ештеңеге жауап бере алмайтынын жеткізіп, шарасыздықтарын білдірді.

Белбұлақ ауылының белсендісі Гүлнар Ахметова: «Бұл жыр жылда қайталанады. Ауыл тұрғындары жаз бастала салысымен судан тапшылық көреді. Ауылдың төменгі жағындағыларда су бар, ал жоғары жағында тұратындар судан қағылып жатады. Болса да, судың қысымы өте әлсіз. Тек кешке қарай сылдырап келеді. Келді деген суымыздың өзі ішуге жарамсыз. Сап-сары лай су, ішінде құрттар жүреді. Ауыл жастары он бес күннен бері «Алматы – Талғар» трассасын жауып, митингіге шығамыз» деп қомданып отыр. Алайда оларға басу айтып, әкмшіліктегілермен кездесіп, мұның қашанға дейін жалғаса берерін біліп алуды жөн көріп келіп отырмыз», – деді.

Шуылдасқан тұрғындарға басу айту мақсатымен әлден уақытта тұрғынүй комуналдық шаруашылығы саласының бас маманы Асхат Әбілғазиев келді. Оны ортаға алған көпшілік жан-жақтан жамыраса сұрақтар жаудырды. Жамырасқан тұрғындарға ол: «Қазір суға жауапты басшыларды шақырамын. Судың неге жоқтығын, қысымның неліктен аздығын солар түсіндіріп берсін. Сәл сабыр сақтаңыздар», – деп телефонына жармасып, әлдекімдерге хабарласып жатты. Арада жарты сағат уақыт өткен шақта жиналған қауымның алдына келген «Талғар топтық су құбырының» бастығы Әли Садыров, керісінше, судың жоқтығына халықтың өзін кінәлады. «Су қайда­лаған?» жұрттың сауалына ол: «Біздің құзырымызда осыдан 60 – 70 жыл бұрын жүргізілген су құбырлары. Кең­ес өкіметі тұсында жүргізілген су құбырынан тұтынушыларға пай­да­лан­ған суды есептеп отыратын құрыл­ғы қойылмаған. Жаз кездері тұр­ғындар бау-бақшаларына суды ағызып қояды. Су тынымсыз ағып тұрғандықтан жоғары жақта тұратын ауыл тұрғындары сусыз қалады. Тап­шылыққа негізінен өздеріңіз кінәлі­сіздер! Ауыз су құбырымен келіп тұр­ған суды бау-бақшаларыңызға пайдаланбасаңыздар мұндай су тап­шылығы болмас еді», – деп айды аспаннан бір-ақ шығарды.

Арнайы бағдарлама ар­қылы тар­тылған 50 шақы­рым­дық су құбы­рын «Ақ жол» атты мердігер ком­пания жылдың басын­да аяқтап өткізген. Алай­да ішінара шыққан кемшілік­терге байланысты аудан әкімшілігі қабылдамаған екен. Компания кемшілік­терді жойғанда ғана әкімдік су құбырын қабылдайды. Сөйтіп оны басқа бір мекемеге жауапты етіп табыстайды. Бұл құбыр іске қосылып, пайдалануға берілсе, сонда ғана су тапшылығы жойылатын болады дейді тұрғынүй комуналдық шаруашылығы саласының бас ма­ма­ны Асхат Әбілғазиев. Жаңа құбыр пайдалануға берілмей, тұрғындар суды мақсатсыз қолдана берген жағдайда су тапшылығын ешкім де жоя алмайтын көрінеді. «Жаңа су құбырының қашан қабылданып алынатынын, халық игілігіне қашан берілетінін мен нақты айта алмаймын. Келесі айдың аяғына дейін беріліп қалады деген сөз бар. Оған дейін менің қолымнан ештеңе келмейді», – деп ашығын айтты бас маман.

Осы шақта жиналғандардың арасы­нан суырылып шыққан Наталья Сакардина: «Осы Белбұлақ ауылының Горький көшесіндегі 29-үйде тұрамын. Үйімде сусыз отырғаныма бір аптадан асты. Менің кішкентай үш балам бар. Егерде кешке дейін үйіме су келмей немесе водовозбен су әкелінбейтін болса, үйдегі ыдыс-аяғымды, кір-қоңымды, бала-шағамды әкімшілікке келіп жуатын боламын. Өйткені бір аптадан бері балаларымды су­мен жуындырудың орнына ылғал салфет­камен сүртіп отырмын. Кір-қоңым, ыдыс-аяғым сол уақыттан бері жуылмай тұр. Тау болып үйіліп қалды. Менде басқа шара қалған жоқ», – деді ашына.

Сағат он екілер шамасында ауыл­дық округі әкімінің орынбасары Абзал Сабалиев ақыры жиналыстан оралды. Бір аптадан астам уақыт ыдыс-аяқ тұрмақ, бала-шағасын жуын­дыруға су таппай қиналған жұрт «Ауыз су қайда?» деген сауалды әкім орынбасарына да қойды. Бірақ ауыз сусыз отырған ауыл тұрғындары үшін бұлар да жауапкершілік алу­дан басын ала қашты. «Талғар топ­тық су құбыры» мекемесі біздің әкім­шілікке бағынышты емес. Суға солар жауап беруі тиіс. Бұлардан бөлек жаңадан тартылған су құ­быры­ның іске қосылуын күтіп отыр­мыз. Бұл желінің неге іске қосыл­май, кешеуіл­деп жатқанынан хабарсыз­бын. Бұл мәселені сәуір айынан бері көтеріп келеміз. Алайда әзірге ешқандай нәтиже шыққан жоқ. Ауыл тұрғындары бірнеше мәрте арыз-шағыммен келгендіктен біз тиісті мекемелерге хаттар жолдап, олармен бірнеше мәрте кездесулер де өткіздік. Сол кездесулерде «Нұра топтық су құбыры» мекемесі «Алатау» бөлімшесіне сенімсіздік танытып, басшыларына халық көтеріп отырған мәселе бойынша талап арыз хатын жіберген болатынбыз. Бұл арызымыз астанада көтерілді. Содан кейін Алматы облысы департаментінің басшылығы, бас инженері келіп, осы жерде дөңгелек үстел өткізіп, осы мәселелер талқыланды. Сол кез­дері «Нұра топтық су құбыры» мекемесі «Алатау» бөлімшесінің басшылары халықтан кешірім сұрап, мұндай жағдайлардың екінші қайталанбайтындығын айтқан бола­тын. Қарап отырсақ, қазір шілде айы болды. Ешқандай нәтиже жоқ. Жаңадан салынған екінші су құбырының біткеніне де жарты жыл болды. Бұл құбыр әлі «Талғар топтық су құбыры» мекемесіне, не «Нұра топтық су құбыры» мекемесіне берілген жоқ. Осылардың біріне берілсе, абоненттік қосылу жұмыстары жүргізіліп, жұртшылыққа су берілер еді. Сол шақта ғана халық наразылығы тоқтайды. Олай болмайынша, су жыры әзірге біте қоймайды», – деп жауап берді.

Жан-жақты тараптардың сөзі осындай. Ауылдық округі әкімдігі ауыл тұрғындарының қамын күйттеп, компанияларды жауапқа тартқызудың орнына, екі ортада хат алмасып, тек қағаз жүзінде ғана әрекет етіп отырған жайы бар. Хат жазып, «қатырдық» дегендер енді қағаз жаратып бол­ған соң кабинеттерінде жаңа су құбыры­ның іске қосылуын күтіп отыр. Ол іске қосылмай, шулаған жұрттың шуылы басылмайтыны ашық көрініп тұр.

Кенжеғали ҚОШЫМ-НОҒАЙ