Тіл тазалығы — баршаға ортақ

Ауданымызда жыл сайын дәстүрлі түрде өтетін «Тіл тазалағы» акциясы биыл сәуір айының бірінен бастап жалғасын тапты. Ана тіліміздің мәртебесін көтеруді мақсат еткен шара өткен жылдары арнайы жұмыс тобының атсалысуымен өтсе, осы жылдан бастап жастар мен қарапайым халық жұмылдырылды. Нақтырақ айтсақ ауданымыздағы колледж жастары мен аналар кеңесінің және Талғар аудандық белсенді ұзақ өмір орталығының қарттары тартылды. Талғар аудандық мәдениет үйінде шараның арнайы ашылу салтанаты өтті. Айтулы шара Талғар ауданы мәдениет, тілдерді дамыту, дене шынықтыру және спорт бөлімінің басшысы Фарида Мамырбекқызының «Тіл – ұлттыңжаны» атты мазмұны терең баяндамасымен басталды. Шараның басты мақсаты: ауданымыз бойынша деректер мен көрнекі ақпараттарда тіл нормаларының Қазақстан Республикасының «Тіл туралы» және «Жарнама» туралы Заңдарының талаптарына сәйкес ресімделуі мен сауатты жазылуын қадағалау.

– Ұлттың тілі — сол ұлттың жаны, жан дүниесі. Ол жүректі соқтырып тұрған қан тамыры сияқты. Сан ғасырды артқа тастап, ата—бабамыздан мұра болып жеткен асыл тілімізді сол саф таза күйінде ұрпаққа аманаттау біздің қасиетті борышымыз. Ұлы ағартушы, мемлекет және қоғам қайраткері Ахмет Байтұрсынов атамыздың «Сөзі жоғалған жұрттың, өзі де жоғалады» деген сөзі де – соның бір дәлелі. Өйткені, тіл ұлттың бар құндылығын, мұң-зарын, қуанышын жеткізетін құрал. Тіл мәселесі өте жан ауыртарлық мәселе. Тіл біздің бақытымыз болса, тілдің бақыты оның болашағының жарқын болуы, ұлтының оны қадыр тұтуында. «Ана тілі-халық боп жасағаннан бері жан дүниеміздің айнасы, өсіп-өніп түрлене беретін, мәңгі құламайтын бәйтерегі» — деп Жүсіпбек Аймауытов айтқандай, патриот азаматтың жүрегі қашанда тілі, ұлты болып соғуы тиіс, — деп атап өтті бөлім басшысы Ф. Бегенбаева.

Берілген ақпараттарға сүйенсек, аталған акция аясында 12 жұмыс тобы жұмыс атқарады. Олар тіл жанашырларымен бірлесе отырып зерделеу, түсіндіру жұмыстарын жүргізеді. Өткен жылы аталған акция барысында халыққа қызмет көрсететін орындардағы 910 нысанға рейдтік зерделеу жұмыстары жүргізілген. Оның ішінде «Тіл туралы» Заңның талаптарына сәйкес келмейтін 814 нысан анықталып, оның 797 түзетілген. Сонымен қатар осы мақсатта 284 іс—шара өткізілген. «Тіл тазалағын сақтайық!», «Тіл – халықтың қазынасы», «Алдаспан», «Батагөй» сынды түрлі тақырыпта өткізілген шаралар көп олқылықтың орнын толтырды. Акция аясында табысты жұмыс атқаруға ауылдық округтер сараланып, марапатталып отырды. Осы жұмыстың негізінде қала, ауылдық округ әкімдіктері көшеге атау беру, қайта атау кезінде республикалық ономастика комиссиясымен мақұлданған тарихи тұлғалар, тарихи жер—су аттары, дәстүрлі атаулар тізімін басшылыққа алып жұмыс жүргізді. 2025 жылы 258 көшенің атын ауыстыру жоспарланып отыр. Ономастикаға қатысты саяси ахуал тұрақты, көше атын беру белгіленген Заң талаптарына сәйкес жүргізілмек. Сонымен қатар мектептерге Алаш арыстарының атын беру де жоспарлануда.