«Туған жердей жер болмас, туған елдей ел болмас» – дейді дана халқымыз.
Құрметті, қадірлі талғарлықтар!
Биылдан бастап қыркүйек айының екінші сенбісі – Талғар қаласының күні болып жыл сайын тойланатын болды. Бұл мереке – әрбіріміз үшін ортақ қуаныш, туған жерге деген махаббатымызды оятатын күн.
Баршаңызды сүйікті шаһарымыз – Талғар қаласының күнімен шын жүректен құттықтаймын!
Бұл күн – тек қана қала мерекесі емес, ол – әрбіріміздің жүрегіміздегі туған жерге деген ыстық ықыласымыздың, құрметіміздің белгісі. Туған жер – тағдыр сыйы. Адам үшін туған топырақтан, кіндік қаны тамған өлкеден асыл ештеңе жоқ.
Алла Тағала баршамызға мейірімін төгіп, жерімізге жақсылық пен береке дарытсын. Туған өлкеміздің мерейі артып, халқымыздың ынтымағы мен ырысы көбейе берсін!
Тарихы терең – Талхиз мұрасы
Талғардың тарихы тым тереңде жатыр. Ортағасырлық жазбаларда бұл өңір Талхиз қаласы ретінде белгілі. Ұлы Жібек жолының бойындағы ірі сауда орталықтарының бірі болғаны белгілі. Қазба жұмыстары барысында табылған қыш бұйымдар, тиындар, тұрмыстық заттар – ата-бабамыздың өркениеті жоғары, мәдениеті биік болғанын дәлелдейді.
Ежелгі Талхиз – бүгінгі Талғардың рухани бастауы. Сол қаланың даңқы мен дақпырты қазіргі шаһарымыздың тарихымен астасып жатыр. Біз – сол бай мұраның заңды жалғасы әрі аманатын арқалаған ұрпақпыз.
Табиғаты көркем өлке
Алатаудың баурайында орналасқан Талғар қаласы табиғатымен ерекше. Тау бөктерінен бастау алатын мөлдір бұлақтар, күміс сылдыры құлаққа әуен сыйлайтын өзендер, самал желмен сыбдырласқан қарағайлы орман – бәрі де жанға сая.
Қарлы шыңдар – өрліктің, жасыл ормандар – мәңгіліктің, мөлдір бұлақтар – тазалықтың символы. Қазақ «Таза ауа – жанға дауа» дейді. Біз сондай әсем де саф ауада өмір сүріп жатқанымыз үшін шүкірлік етуге тиіспіз.
Қаланың дамуы – болашаққа жол
Талғар – бүгінде қарқынды дамып келе жатқан қала. Соңғы жылдары білім беру саласында жаңа мектептер мен балабақшалар салынып, балалардың болашағына кең жол ашылуда.
Спорт кешендері, мәдениет үйлері, ауруханалар мен емханалардың жұмысы да жанданып келеді. Жастарымыз ғылым-білімге құштар, спортта да, өнерде де жетістіктерімен қуантады.
Сонымен бірге, IT, инновация, кәсіпкерлік саласында жас буынның жетістіктері артып келеді. Бұл – Талғардың болашақта тек мәдени, тарихи ғана емес, жаңа заманға сай зияткерлік қала ретінде дамитынының айғағы.
Руханият пен имандылық
Бүгінде Талғар қаласында 5 мешіт халыққа қызмет етуде. Бұл – руханиятымыздың тірегі. Мешіттер жамағатқа имандылықты, бірлікті, татулықты насихаттап, жастардың жүрегіне ізгілік дәнін егуде.
Пайғамбарымыздың (с.а.с.): «Тазалық – иманнан» деген өсиеті – әрбір мұсылманға бағдаршам. Талғар жұрты да осы ұстанымды берік ұстап, тазалық пен ізгілікті өмір салтына айналдырған.
Мәдениет пен өнер ордасы
Қаламызда мәдениет саласы да ерекше дамып келеді. Өнерпаз жастардың концерттері, халықтық мерекелер, спорттық жарыстар – бәрі де Талғардың рухани келбетін айшықтайды.
Талғар – мәдениеті мен өнері қатар өркендеген, болашаққа сеніммен қарайтын шаһар.
Экология – ортақ парызымыз
Алланың берген табиғаты – бізге аманат. Таудың саф ауасы мен мөлдір бұлағын сақтау, орманын қорғау – әрбір тұрғынның міндеті.
Табиғатты аялау – келешек ұрпақ алдындағы ең қасиетті борышымыз. Егер бүгін қорғап қалсақ, ертең баламыз бен немереміз таза, көркем өлкеде өмір сүретін болады.
Туризм әлеуеті
Талғардың баурайы – тек біздің ғана емес, еліміздің мақтанышы. Талғар асуы, қарлы шыңдар, тау бөктеріндегі демалыс орындары жыл сайын мыңдаған қонақты тартып келеді.
Тарихы мен табиғаты тоғысқан бұл өңір – Қазақстандағы туризмнің әлеуеті зор аймақтарының бірі.
Халық бірлігі – ең үлкен қазына
Талғар – көпұлтты, көпконфессиялы қала. Қазақ, орыс, ұйғыр, түрік, кәріс және басқа да ұлт өкілдері татулық пен ынтымақта өмір сүріп келеді.
«Бірлік бар жерде – тірлік бар» дейді дана халқымыз. Міне, дәл осы бірлігіміздің арқасында қаламыз өркендеп, болашағы жарқын болмақ.
Қадірлі ағайын!
Туған жеріміздің мерейі арта берсін, Талғарымыз мәңгі бейбітшілік пен татулықтың мекені болғай!
Жақсылықов Бахтияр Жақсылықұлы,
AMANAT партиясы Талғар БПҰ төрағасы
