Қай кезеңде болмасын, елдің болашағын айқындайтын ең басты құжат – оның Конституциясы. Ата Заң мемлекеттің бағыт-бағдарын белгілеп қана қоймай, қоғамның даму қағидаттарын, азаматтардың құқықтары мен бостандықтарын айқындайды. Сондықтан Жаңа Конституция – бұл жай ғана өзгерістер жиынтығы емес, бұл біздің қуатты, әділетті және заманауи Қазақстанды құру жолындағы саналы таңдауымыз. Қасым-Жомарт Тоқаев бастамасымен қолға алынған саяси реформалар ел өмірінде маңызды бетбұрыс жасады. Бұл реформалардың түпкі мақсаты – халық үніне құлақ асатын мемлекет қалыптастыру, билік пен қоғам арасындағы байланысты нығайту, әділдік қағидаттарын орнықтыру болды. Жаңа Конституция осы бағыттағы өзгерістерді құқықтық тұрғыда бекітіп, мемлекеттілігіміздің жаңа кезеңін бастады.
Біріншіден, Жаңа Конституцияда адам және оның құқықтары мен бостандықтары ең жоғары құндылық ретінде айқындалды. Бұл – мемлекеттің басты назарында азаматтың мүддесі тұратынын білдіреді. Әрбір қазақстандық заң алдында тең, әркімнің пікір айтуға, білім алуға, еңбек етуге, қауіпсіз өмір сүруге құқығы бар. Осындай ұстанымдар әділетті қоғамның берік негізін қалайды. Екіншіден, билік тармақтары арасындағы тепе-теңдік күшейтіліп, Парламенттің рөлі артты. Бұл демократиялық үдерістердің дамуына жол ашып, шешім қабылдау барысында ашықтық пен жауапкершілікті қамтамасыз етеді. Жергілікті басқару жүйесіне де өзгерістер енгізіліп, азаматтардың өңірлік мәселелерді шешуге қатысу мүмкіндігі кеңейді. Бұл – халықтың мемлекет ісіне белсенді араласуына жасалған нақты қадам. Үшіншіден, Жаңа Конституция заң үстемдігін нығайтуға бағытталған. Заңның бәріне ортақ әрі міндетті болуы – тұрақтылық пен сенім кепілі. Қоғамда әділдік салтанат құрғанда ғана елдің дамуы жүйелі әрі баянды болады. Сондықтан құқық қорғау жүйесін жетілдіру, сот әділдігін қамтамасыз ету – жаңа өзгерістердің маңызды бөлігі. Жаңа Конституция – бұл тек бүгінгі күннің емес, болашақ ұрпақтың мүддесін көздейтін құжат. Ол еліміздің саяси мәдениетін жаңғыртып, азаматтық жауапкершілікті арттыруға ықпал етеді. Әсіресе жастар үшін бұл – белсенділік танытып, ел дамуына өз үлесін қосуға берілген мүмкіндік.
Жаңа Конституция – біздің бірлігіміз бен ортақ мақсатымыздың көрінісі. Ол – қуатты мемлекет, әділетті қоғам және заманауи Қазақстан құру жолындағы берік құқықтық негіз. Ендеше, бұл тарихи таңдау әрқайсымыздың саналы көзқарасымыз бен азаматтық ұстанымымыздың нәтижесі екенін ұмытпайық.
