Бүгінгі күнде қоғамда орын алып отырған өзекті мәселелердің бірі кәмелеттік жасқа толмаған жасөспірімдер арасындағы құқық бұзушылық пен қылмыстық әрекеттердің, өзіне-өзі қол жұмсау жағдайларының белең алуы болып отыр. Күні кеше ауданымызда балалар қауіпсіздігін сақтап, бала тәрбиесіне қоғамның назарын аудару мақсатында үлкен жиын болып өткен еді.
Ауданымызға арнайы жұмыс сапарымен келген Қазақстан Республикасы Парламенті Сенатының депутаты, Бала құқықтары жөніндегі уәкіл Сәуле Айтпаева аталмыш жиынға қатысып, аудан жұртшылығымен кездесті. Жиынға аудан әкімінің орынбасары Хайдар Әбдіханов пен облыстық білім басқармасының басшысы Дәурен Жүнісов арнайы қатысып, облыстық прокуратура, полиция департаментінің жергілікті полиция қызметі, облыстық, аудандық мәслихат депутаттары, денсаулық сақтау, білім беру ұйымдарының басшылары, техникалық және кәсіптік білім беру ұйымдарының басшылары мен мектеп директорлары, директордың тәрбие ісі жөніндегі орынбасарлары, педагог-психологтар, ата-аналар комитетінің төрағалары мен үкіметтік емес ұйымдар жетекшілері шақырылды. Қаламыздағы Талғар агробизнес және менеджмент колледжінде өткен жиынды аудан әкімінің орынбасары жүргізіп отырды.
Жиынның алғашқы сөзі Қазақстан Республикасы Парламенті Сенатының депутаты, Бала құқықтары жөніндегі уәкіл Сәуле Айтпаеваға берілді. Өз сөзінде ол бүгінде елімізде кәмілеттік жасқа толмағандар арасында құқық бұзушылық әрекеттердің өршіп бара жатқанын, сонымен қатар қоғамды алаңдатып отырған балалар арасындағы өзіне-өзі қол жұмсау мен балаларға жасалынып жатқан қатігездік әрекеттердің жиілеп кеткенін, бүгінгі күндегі отбасындағы бала тәрбиесі мен білім шаңырақтарындағы жасөспірімдердің қауіпсіздігінің сақталуы сынды мәселелер төңірегінде сөз қозғады. Статистикалық мәліметтерге сүйенер болсақ, өткен жылдың қаңтар-желтоқсан айлары аралағында кәмілеттік жасқа толмағандармен 288 қылмыстық әрекеттер орын алса, биылғы жылдың төрт айында орын алған қылмыстар саны 81-ге жеткен. Ал өткен жылы кәмілеттік жасқа толмағандар арасында 18 суицидтік әрекеттер тіркелсе, биылғы жылдың төрт айында 11 жасөспірім өз-өзіне қол салып өмірден өткен. Олардың 4-і біздің ауданымызда орын алғаны айтылды. Бұл жайында облыстық білім басқармасының басшысы да өз баяндамасында айта кетті. Сонымен қатар Дәурен Жүнісов облыс бойынша кәмілеттік жасқа толмағандардың арасындағы студенттерді, мектеп жасындағы оқушылар мен аз қамтылған, жайсыз отбасында тәрбиеленіп жатқан балалар санын тарқата айтып, облысымыздағы балалар қауіпсіздігіне байланысты мәселелер төңірегінде сөз қозғады. Содан кейін сөз алған заңға қарсы жүретін, өмірдің қиын жағдайына тап болған кәмілетке толмағандар және олардың ата-аналарына әлеуметтік-психологиялық, құқықтық қолдау көрсететін республикалық «Право» қоғамдық қорының өңірлік «Шанс» орталығының директоры Ғалым Куджаков та тақырыпқа сай өз ойымен бөлісті.
Әрі қарай еркін пікір алмасу кезеңіне кезек берілді. Жиынға қатысып отырған көпшілік арасынан кезекпе кезек сөз алған Талғар аудандық ата-аналар комитетінің мүшесі З.Садықова, Есік гуманитарлық-экономикалық колледжі директорының тәрбие ісі жөніндегі орынбасары Г.Байтукенова, аудандық әкелер кеңесінің төрағасы Б.Нәдірбек, №32 орта мектептің педагог-психологы Ш.Созақбаева, Жамбыл ауданындағы отбасы үлгісіндегі балалар үйінің тәрбиешісі А.Абсеметова, облыстық «Жетісу» газетінің тілшісі Ұлбосын Исабектер қазіргі таңдағы бала тәрбиесіне қатысты бірнеше мәселені көтеріп, сұрақ-сауалдарын қойды. Атап айтқанда, балалар үшін әлеуметтік желіде шектеулер қою, букмекерлік ойын орындарын жабу, мектеп жасындағы балаларға смартфондар ұстауды шектеп, тек баламен байланыс орнату үшін қарапайым үлгідегі ұялы телефондар қолдануын назарға алу, балалардың мектеп қабырғасында жұмысқа тартылуын ата-аналардың рұқсатынсыз бекіту, ұстаздар мен оқушылар арасындағы қарым-қатынас, ұстаздар беделін арттыру, отбасындағы бала тәрбиесі, Талғар аудандық білім бөліміне басшы тағайындау сынды мәселелер тұрғысында сұрақтар қойылды. Пікір алмасу кезінде қойылған сұрақ-сауалдарға президиум мүшелері кезекпе кезек жауап беріп отырды. Кейбір мәселелерді Сенат депутаты Сәуле Айтпаева назарына алып, болашақтың еншісіне қойды. Алқалы жиыннан кейін Сәуле Мұханбедианқызы Талғар агробизнес және менджмент колледжінің студенттерімен кездесіп, қаламыздағы №8 Ю.Гагарин атындағы арнаулы гимназиясының, №3 орта мектептің, Бесағаш ауылындағы №29 орта мектептің ұжымы және оқушыларымен кездесіп қайтты.
Перизат Нұрқаева,
«Талғар».
