Кез келген мемлекеттің дамуы мен тұрақтылығы ең алдымен оның құқықтық негіздерінің беріктігіне байланысты. Ал сол негіздің өзегінде Конституция тұрады. Бұл – елдің басқару жүйесін айқындайтын құжат қана емес, азаматтардың құқықтары мен бостандықтарына кепілдік беретін, қоғам өмірінің маңызды бағыттарын реттейтін басты заң.
Конституцияның негізгі құндылығы – әрбір адамның заң алдындағы теңдігін қамтамасыз етуінде. Қоғамда әділдік орнауы үшін ешкімнің құқығы аяқасты етілмеуі, заң талаптары барлық азаматқа бірдей қолданылуы тиіс. Мемлекеттік органдардың қызметі де осы талаптарға негізделіп, қабылданатын әрбір шешім заңдылық пен ашықтық қағидаттарына сай болуы қажет.
Бүгінде құқықтық мәдениетті қалыптастыру мәселесі айрықша маңызға ие. Өйткені өз құқығы мен міндетін жақсы білетін азамат қоғамдағы өзгерістерге саналы түрде араласып, заңды мүддесін қорғай алады. Білім алу, еңбек ету, медициналық көмекке қол жеткізу, пікірін еркін білдіру секілді негізгі құқықтардың қамтамасыз етілуі – Конституцияда белгіленген нормалардың нақты өмірде жүзеге асуының көрінісі.
Сонымен қатар әділетті қоғам құру тек мемлекеттік органдардың міндеті емес. Бұл іске әрбір азаматтың қосар үлесі бар. Заңды құрметтеу, қоғамдық тәртіпті сақтау, өзгенің құқығына құрметпен қарау және ел өміріндегі маңызды мәселелерге бейжай қарамау – жауапты азаматтық ұстанымның белгісі. Қоғамда осындай көзқарас қалыптасқанда ғана өзара сенім мен жауапкершілік нығаяды.
Конституциялық нормалардың қағаз жүзінде қалмай, нақты іс жүзінде орындалуы ерекше назар аударуды талап етеді. Ол үшін мемлекеттік басқару жүйесінде заңдылықты сақтау, азаматтардың өтініштеріне уақытылы әрі сапалы жауап беру, құқық бұзушылықтардың алдын алу және халықтың заңды мүдделерін қорғау бағытындағы жұмыстар жүйелі жүргізілуі керек.
Әділетті қоғамның қалыптасуы бір күнде жүзеге аспайды. Ол – заңға деген құрметтен, азаматтардың белсенділігінен және мемлекеттік институттардың жауапкершілігінен басталатын ұзақ мерзімді үдеріс.
Сондықтан Конституцияны құрметтеу – оның талаптарын білу ғана емес, ондағы қағидаттарды күнделікті өмірде басшылыққа алу. Заң үстемдігі берік орныққан, әр адамның құқығы қорғалған қоғамда ғана тұрақты даму мен қоғамдық келісімнің негізі қаланады. Демек, Конституция – ел бірлігін нығайтып, әділетті болашаққа бастайтын ортақ құндылық.