Қазақ халқы қашанда үлкенді сыйлап, қариясын төрге оздырған. «Қарты бар үйдің қазынасы бар» деп, ақсақалдың батасын, ақ жаулықты әженің ақылын өмірлік өнеге санаған. Өйткені қарттық – адамның ғұмыр жолындағы ерекше кезең ғана емес, тұтас бір әулеттің, бір елдің өткенін бүгінмен жалғап тұрған алтын көпір. Аға буынның өмір жолы – кейінгі ұрпақ үшін тағылым, айтқан сөзі – ақыл, берген батасы – рухани демеу.
Осы орайда Талғар аудандық Мәдениет үйінде Қарттар күніне орай мерекелік концерттік шара ұйымдастырылып, ауданның ардақты қарияларына құрмет көрсетілді. Мерекелік басқосу аға буын өкілдеріне деген ыстық ықылас пен ізгі ниетке толы болды. Жиналған қарияларға құрмет көрсетіліп, олардың ел дамуына қосқан еңбегі мен өмірлік тәжірибесі дәріптелді.
Шара барысында Талғар ауданының мәдениет, тілдерді дамыту, спорт және дене шынықтыру бөлімінің басшысы Бегенбаева Фарида Мамырбекқызы сөз сөйлеп, ақ жаулықты әжелер мен ақсақалды аталарды айтулы мерекемен құттықтады.
– Құрметті ардақты қариялар! Сіздер – кейінгі ұрпаққа жол көрсетіп, ақыл-кеңес беріп келе жатқан елдің үлкен тірегісіздер. Бүгінгі бейбіт өміріміз бен жарқын күндеріміздің қалыптасуына сіздердің еңбектеріңіз бен маңдай терлеріңіз сіңді. Сіздердің өмір жолдарыңыз – біз үшін үлкен мектеп. Қарттар күні – сіздерге деген құрметімізді білдіретін ерекше мереке. Әрқайсыңызға зор денсаулық, ұзақ ғұмыр, отбасыларыңызға амандық, шаңырақтарыңызға береке тілеймін. Балаларыңыз бен немерелеріңіздің қызығына бөленіп, ел-жұрттың сый-құрметіне бөленіп жүре беріңіздер, – деді Фарида Мамырбекқызы.
Мерекелік шараның демеушісі болған Талғар аудандық «Әділет» партиясының төрағасы Серік Дүмшабаев та қарияларға жылы лебізін білдіріп, олардың ел өміріндегі орнына тоқталды. Ол аға буын өкілдеріне алғыс айтып, кейінгі ұрпаққа көрсеткен өнегесі мен еңбегін ерекше атап өтті.
Қарияларға құрмет көрсету – халқымыздың ежелден келе жатқан асыл дәстүрлерінің бірі. Ұлттық тәрбиенің негізінде үлкенді сыйлау, кішіге ізет көрсету ұғымдары жатыр. Сондықтан Қарттар күні бір күндік мереке ретінде ғана емес, ұрпақ сабақтастығын, үлкенге деген құрметті, адамдық қарым-қатынасты дәріптейтін маңызды күн ретінде бағаланады. Мерекелік кештің сәнін мәдениет үйінің өнерпаздары келтірді. Кеш барысында әсем әндер шырқалып, күмбірлеген күй мен мың бұралған би көрермен көңілін көтерді. Өнерпаздардың орындауындағы ән-жырлар мерекенің мазмұнын аша түсіп, қарияларға ерекше көңіл күй сыйлады. Сахнадан төгілген әрбір ән аға буынға деген құрметтің, ізеттіліктің белгісіндей әсер қалдырды. Залда отырған қариялар өнерпаздарға ризашылықтарын білдіріп, ыстық ықыластарын жеткізді. Ән мен әуенге ұласқан кеш барысында олардың жүзінен қуаныш пен шаттықты аңғаруға болатын еді. Бір сәтке күнделікті тіршіліктің күйбеңі ұмытылып, барша жиналғандар мерекелік көңіл күйге бөленді.
Қарттық – өмірдің қорытындысы емес, кейінгі ұрпаққа жинаған тәжірибені табыстайтын парасатты кезең. Қариялардың әрбір әңгімесінде өткен тарихтың ізі, әрбір ақыл-кеңесінде өмірден түйген мол тәжірибесі бар. Сондықтан үлкен буынды ардақтау – елдің өткеніне құрметпен қарап, болашағына жауапкершілікпен қарау деген сөз.
Талғар ауданында да аға буын өкілдеріне құрмет көрсетуге, олардың әлеуметтік және рухани өміріне қолдау білдіруге ерекше мән беріліп келеді. Қоғамның дамуына саналы ғұмырын арнаған еңбек ардагерлері мен ел ағаларының өмір жолы кейінгі ұрпаққа әрдайым үлгі. Бүгінде арамызда талай жыл ел игілігі үшін еңбек етіп, сан түрлі саланың дамуына үлес қосқан ардақты жандар бар. Бірі – ұстаздық жолды таңдаса, енді бірі – денсаулық сақтау, мәдениет, өндіріс, ауыл шаруашылығы, мемлекеттік қызмет, кәсіпкерлік және басқа да салаларда маңдай терін төкті. Олардың әрқайсысының артында ел тарихының бір парағы жатыр.
Қазақта «Атадан – өсиет, анадан – қасиет» деген сөз бар. Расында да, кейінгі буынның бойындағы адамгершілік қасиеттердің қалыптасуына ата-әженің тәрбиесі ерекше ықпал етеді. Немересіне ертегі айтып, ұлттық салт-дәстүрді үйретіп, үлкенге құрмет, кішіге ізет көрсетуді түсіндіретін де – осы аға буын. Қазіргі таңда технология мен ақпарат дәуірі қарқынды дамып, қоғамның өмір салты өзгеріп жатқанымен, үлкенге деген құрмет, ата-ананы ардақтау, қарияның батасын алу секілді ұлттық құндылықтардың маңызы ешқашан төмендемейді. Керісінше, осындай рухани құндылықтар қоғамдағы өзара сыйластық пен бірліктің негізін қалыптастырады.
Қарттар күніне арналған мерекелік кештің негізгі мақсаты да – аға буын өкілдеріне көңіл бөліп, олардың қоғамдағы орнын айшықтау, кейінгі ұрпаққа үлкенді құрметтеудің үлгісін көрсету. Бұл тұрғыдан алғанда, Талғар аудандық Мәдениет үйінде өткен шараның маңызы зор. Қариялар үшін ең үлкен сыйлық – жылы сөз бен шынайы құрмет. Кейде бір ауыз ізгі тілек, көңіл сұрау, амандығын білу, төрге шығарып, әңгімесін тыңдау – үлкен адам үшін бағасы жоқ сый. Өйткені адам өмірінің қай кезеңінде де өзіне деген ықылас пен құрметті сезінуге мұқтаж. Мерекелік шара барысында осы ізгі ниет айқын сезілді. Қарияларға құрмет көрсетіліп, олардың көңілін көтеретін концерттік бағдарлама ұсынылды. Өнерпаздардың өнері мен ұйымдастырушылардың ықыласы аға буын өкілдеріне мерекелік көңіл күй сыйлады.
Ел ішінде «Батаменен ел көгерер, жаңбырменен жер көгерер» деген аталы сөз бар. Қазақ үшін қарияның батасы – қашанда қастерлі. Ақсақалдың ақ батасы мен ақ жаулықты әженің тілегі – ұрпаққа рухани күш беретін қасиетті сөз. Сондықтан қарияны қадірлеу арқылы біз өзіміздің ұлттық болмысымызды, салт-дәстүрімізді, үлкенге құрмет көрсету мәдениетін сақтаймыз.
Талғардағы мерекелік шарада да ақсақалдар мен әжелердің жүзінен ризашылық байқалды. Өйткені олардың еңбегін бағалап, өмір жолын құрметтеу – кейінгі ұрпақтың парызы.
Қарттар күні – баршаға ортақ мереке. Себебі бүгінгі жас – ертеңгі аға буын. Бүгінгі бала – ертеңгі қария. Өмірдің бұл заңдылығы адамды үлкенді сыйлауға, уақыттың қадірін түсінуге үйретеді. Сондықтан қарияларға көрсетілген құрмет – шын мәнінде өз болашағымызға көрсетілген құрмет. Аға буынның өнегелі өмірі мен жас ұрпақтың жігері сабақтасқанда ғана қоғамның рухани тұтастығы нығая түседі. Өткенін қадірлеген елдің келешегі де кемел болмақ.
Талғар аудандық Мәдениет үйіндегі мерекелік кеш осыны тағы бір мәрте аңғартты. Қариялар бір күнге ғана емес, әрдайым құрметке лайық. Олардың ақылын тыңдап, өмірлік тәжірибесін бағалау, қамқорлық көрсету – баршамыздың азаматтық әрі адамдық міндетіміз.
Ардақты ағалар мен аяулы әжелерге зор денсаулық, ұзақ ғұмыр, отбасыларына амандық, шаңырақтарына құт-береке тілейміз. Әрбір атқан таңдары қуанышқа толып, балалары мен немерелерінің қызығын көріп, елдің сый-құрметіне бөленіп жүре берсін!
Қарияларымыздың әрбір күні мерекеге, әрбір жылы жылы сөзге, әрбір қадамы қуанышқа толы болғай. Ақ баталарыңыз бен ақ тілектеріңіз елге амандық, ұрпаққа бақыт әкелсін!
