31 мамыр – Қазақстан халқы үшін қасірет пен тағылымға толы ерекше күн. Бұл күні елімізде ХХ ғасырдағы саяси қуғын-сүргін мен ашаршылық құрбандары еске алынады. Миллиондаған адамның тағдырына ауыр із қалдырған сол зұлмат жылдар тарихымыздың ең қайғылы беттерінің бірі болып саналады.
1920–1950 жылдары Кеңес өкіметі кезінде мыңдаған қазақ зиялылары, ақын-жазушылар, ғалымдар, мемлекет және қоғам қайраткерлері «халық жауы» деген жаламен қудаланып, түрмеге қамалды, атылды немесе жер аударылды. Алаш арыстары – Ахмет Байтұрсынұлы, Әлихан Бөкейхан, Мағжан Жұмабаев сынды ұлт зиялылары халықтың болашағы үшін күрескенімен, саяси қуғын-сүргіннің құрбаны болды. 1931–1933 жылдардағы ашаршылық қазақ халқына орны толмас қайғы әкелді. Миллиондаған адам аштықтан қаза тауып, көптеген отбасы туған жерін тастап көшуге мәжбүр болды. Бұл нәубет қазақ халқының демографиялық дамуына үлкен зардап тигізді.
Бүгінде Қазақстанда қуғын-сүргін құрбандарын ақтау, олардың есімдерін ұлықтау бағытында көптеген жұмыстар жүргізілуде. Еліміздің әр өңірінде ескерткіштер орнатылып, тағзым ету шаралары ұйымдастырылады. АЛЖИР музей-мемориалдық кешені мен ҚарЛаг музейі – сол зұлмат кезеңнің куәсі болған тарихи орындардың бірі.
31 мамыр – өткенді ұмытпай, тарихтан тағылым алуға үндейтін күн. Жазықсыз жапа шеккен жандарды еске алу – кейінгі ұрпақтың парызы. Тәуелсіз еліміздің бейбіт өмірі мен бірлігі – сол боздақтардың арманы мен аманаты.
