Постиндустриялық қоғам бізден отбасы мен бала тәрбиесіндегі құндылықтарға жаңа қырынан қарауды талап етіп отыр. Жаһандану үрдісіне қадам басқан жаңа ғасырда бала тәрбиесіндегі ата-ананың рөлі мен жауапкершілігін арттыру маңызды болып отырғандығын уақыт өзі дәлелдеуде. Сондықтан да әр халық, әр ұлт дінін, тілін, мәдениетін, тарихын, салт-дәстүрін мейлінше сақтап қалуға тырысып жатыр. Ұлтының құндылықтары – баланың ой-санасын қалыптастыруға, өзінің қай ұлт өкілі екенін біліп өсуге, үлгі-өнеге алуға зор әсерін тигізетінін білгендіктен де сондай қадамға баруда.
«Баланың бас ұстазы ата-ана екені» әуел бастан ләзім дүние болса да балаға тәрбие берумен емес тіршілігін түгендеумен айналысып кеткен ата-анаға өз жауапкершілігін сездіру керектігі күн тәртібіндегі өзекті мәселенің негізгісі болғандықтан Алмалы ауданын қарасты №43 бөбекжай-балабақшасы осы мәселеге дендеп араласып келеді. Ата-аналармен жиі кездесу өткізіп, олардың бала тәрбиесіне жауапкершілікпен қарауын еске салып отырады. Ал бұл жолғы семинар-тренингті «Сенімен Болашақ» республикалық ата-аналар қоғамдық бірлестігімен бірлесе ұйымдастырды.
Барлық ата-анаға ескертілсе де уақыт тауып келген 20-дан аса ата-анаға бірлестік өкілі, журналист Меруерт Мәулетқызы ақпарат беріп, миссиясымен таныстырып өтті. Азаматтардың ерікті бірлесуі нәтижесінде құрылған коммерциялық емес ұйым он тақырыптық бағытта жұмыс жасап, бүгінде ата-анаға ой айту емес, ойын ояту мақсатында жемісті жұмыс істеп жатқандығын жеткізді. Тегеурінді идеямен жолға шыққан керуеннің көш басында тұрған Асанов Нұркен Жарылқапұлы тұрғандығын да жеткізді.
Ал бірлестіктің Алматы филиалы бойынша сарапшысы, психолог, «Практикалық психология» РҚБ өкілі Айгүл Исламбекқызы ата-ана мен бала арасындағы бүгінгі қарым-қатынасқа тереңірек тоқталды. Болашағымыз жарқын болып, саналы ұрпақ тәрбиелеу жолында қайтпек керек деген мәселені кеңінен тарқатты. Семинарға қатысушылардың сұрақтарына жауап беріп, пікірлерін тыңдады. Семинарды мағыналы тренингпен қорытындылап:
- Бала – ата-ананың айнасы. «Не ексең, соны орасың» деп атам қазақ айтып кеткен. Сондықтан қазірден бастап бала тәрбиесіне барынша ден қойсақ, жауапкершілікпен қарап, уақытты бірге саналы да сапалы ғып өткізсек ертең жемісін көретін боламыз, — деген түйінді оймен аяқтады.
Ата-аналармен бала тәрбиесі тақырыбында теориялық және практикалық тұрғыда жемісті жұмыс жасаған бірлестік өкілдеріне балабақша меңгерушісі Ляззат Асылбекқызы алғыс білдіріп, ата-аналарға саналы қоғамды бірге қалыптастыруға шақырды.
