«Адамның мәдениеттілігінің, ой-өрісінің, кеңдігінің, жан-дүниесінің ләззатшыл нәзіктігінің бірден-бір белгісі – көркем әдебиетті қол үзбей оқи білуі», — деп қазақ ғалымы Евней Букетов айтпақшы, әдебиет пен журналистиканы қатар алып жүріп, қыл қаламынан «Ғибрат пен зұлмат», «Біржан бұрмалары», «Бірәлі дастан», «Қанай-Абылай» атты дастандары мен аудармашы ретінде Герман Мелвиллдің «Моби Дик немесе Ақ кит» атты романын тәржімелеген жазушы-журналист Қорғанбек Аманжол есімі талғарлықтарға жақсы таныс. Талғар қаласындағы аудан әкімдігінде спорт бөлімінің басшысы болып оның қоғамдық өміріне белсене араласқан ақын Қорғанбектің Талғар сұлулығы жайлы жазған өлеңдері мен эсселері өз алдына бір төбе. Кезінде республикаға белгілі басшы, ұзақ жыл «Алматы» колхозын басқарған Анатолий Смыков туралы сыр шертетін «Бақыттың жолы бұралаң» атты ғұмырбаяндық кітабын қазақ тіліне аударған Қорғанбек Аманжолдың еңбегін оқырман қауым жақсы біледі.
Жуырда аудандық кітапханада ақын, жазушы, аудармашы, Қазақстан Жазушылар Одағының мүшесі өмір жолында «Жұлдыз» журналы, «Дала дидары», «Дәуір-Время» газеттері мен «Хабар» агенттігінде дубляж редакторы, соңғы жылдары «Егемен Қазақстан» газетінде журналист болып еңбек еткен көркем сөз шебері Қорғанбек Аманжолдың шығармашылығына орай, аудандық мәдениет және тілдерді дамыту бөлімінің ұйытқы болуымен «Туған тілім, төмендемей төрге шық!» деген тақырыппен өте бір мазмұнды кеш болып өтті. Осы кеште өзінің қаламынан туған «Ана тілінің қадірі» атты публицистикалық жанрда жазған толғанысы мен «Тіл туралы», «Қара жердің киесі бар», «Көкбөрілік мінез қайда?» атты өлеңдерін оқыған Қорғанбек Аманжолов Қазақстан Тәуелсіздігінің 30 жылдығын тойлағалы отырған кезде де мемлекеттік тіл – қазақ тілінің ұлттарды ұйыстыратын ортақ тілге айнала алмай отырғандығының себеп-салдарын түсіндіріп берді. Ана тіліне арналған осы кеште ақын Қорғанбек Аманжолдың шығармашылық дүниелеріне шолу жасаған Талғар ақыны, аудандық тілдерді оқыту, әдістемелік орталығының директоры Камнұр Тәлімұлы ақын ағасының көңілдің сыр сандығының нәзік пернесін шерте білетін әр шығармасының тереңдігіне баға берді. Осы кеште арнайы шақырылған қонақ, Қазақстан Жазушылар Одағының мүшесі, «Егемен Қазақстан» газетінің көркем сөз шебері Сүлеймен Мәмет інісі, әрі әріптесі Қорғанбек Аманжолдың шығармашылық жолындағы жүріп өткен жолын түрлі естеліктермен нәр бере отырып әңгімелесе осы кештің қадірлі қонақтарының бірі, сазгер Самат Мәлімбай, ақын Қорғанбектің сөзіне жазылған «Талғарым – жердің жәннаты» атты әлі сиясы кеппеген жаңа әнін жұртшылықа ұсынды. Кеш барысында жергілікті өнерпаз, «Алатау аясында» ән-би ансамблінің мүшесі, дәстүрлі әнші Надхан Манай ақын Қ.Аманжолдың сөзіне жазылған «Анамның тілі» атты әнін тебірене шырқап берді. Сан түрлі ойлар айтылып, оқырманын ойға жетелейтін мемлекеттік тіл – қазақ тілінің шұрайлы тереңіне ерекше мән берілген кешті аудандық мәдениет және тілдерді дамыту бөлімінің басшысы Фарида Бегенбаева қорытындылап, халқының қамын жейтін әрбір ұлтжанды азамат ана сүтімен дарыған қазақ тілінің тұғырында асқақтап тұруы үшін өз үлесін қосуы керек екенін айтты.
Тұрсынбек Жалғасбаев,
«Талғар»
