«Жолан жұлдызы» кітабы жарық көрді

Күні кеше ғана ортамызда жайраңдап жүрген Жолан Омаровтай асыл азаматтың бұл фәниден өткеніне де жылға жуықтады. Қырықтың қырқасынан асқан шағында қатерлі індеттің қылышына іліккен арда азаматтың артында қалған халқы, туыс-туғандары мен жора-жолдастары, қызметтес аға-іні, бауыр-қарындастары осы күнге дейін Жолан Ыбырайақынұлының жақсылықтарын айтудан, насихаттаудан жалыққан емес. Бүгінгі «Жолан жұлдызы» кітабының жарық көруі де ел ықыласының ерекше көрінісі дер едім.

Бүкіл саналы ғұмырын елі мен жерінің гүлденуі жолында арнап, бар бақытын сол адал еңбегінен іздеген өнегелі өмір иесінің жүріп өткен жарқын жолын, атқарған игі істерін, адамгершілігі мен азаматтығын, бауырмашылдығы мен жомарттығын, әділдігі мен адалдығын, парасат-пайымы мен қайраткерлігін баяндайтын естелік кітапты құрастырып, артында өнегелі өшпес із қалдыруды оның рухының алдындағы азаматтық парызымыз бен міндетіміз деп санаған сыйлас ағалары Бақыт Жағыппарұлы мен Дүйсен Мүсірәліұлы осы кітапты жарыққа шығарды.

Сәрсенбінің сәтті күні Талғар аудандық кітапханасында кітаптың тұсауы кесіліп, ел назарына ұсынылды. Салтанатты жиынға аудан әкімінің орынбасары Ахмет Әшімахұн, айтыскер ақын, журналист Бақыт Жағыппарұлы, «Балдырған» журналының редакторы Дүйсен Мағұлымов, аудандық ақсақалдар кеңесінің төрағасы Матан Бекбосынов, ақын Кәмнұр Тәлімұлы, қоғам белсендісі, зейнеткер Құндызай Хасанова, қоғамдық кеңес төрағасы Жұмахан Еңкебайұлы, ақын Бексұлтан Көлбаев, Мақсат Ережепов, аудандық мәдениет және тілдерді дамыту бөлімінің басшысы Фарида Бегенбаева сынды сыйлас болған бірқатар аға-әпкелері, марқұмның әпкесі Ләззәт Омарова мен асыл жары Тоғжан Нұрболатқызы қатысып, Жолан марқұмның көпке өнегелі өмірінен сыр шертіп, еске алды. Кітапта Жолан Омаровпен қызметтес болған сыйлас адамдары, қимас дос-жарандары, тіршілікте аға-іні болып араласқан бауырлары, аяулы ата-анасы мен туған-туыстары, асыл жары арда азаматтың жүріп өткен жолын кеудесіндегі өксігін басып, өкінішін жасырып шын көңілдерімен баяндайды.

Бақыт Жағыппарұлы кітаптың мазмұнымен таныстыра келе, Жолан марқұм қызмет етіп, еңбегі сіңген үш аудан, яғни Кеген, Райымбек, Талғар аудандарының кітапханаларына аталған кітаптарды табыстайтынын жеткізді. Ондағы мақсат — жазылған ғибратты әңгімелерді оқып өскен өскелең ұрпақ терең тәлім алар деген ой. Сондай-ақ ең бірінші салтанатты түрде тұсаукесер рәсімін марқұмның соңғы сәттерін өткізген өңірі Талғар топырағынан бастағандарын айтып өтті.
Тұсаукесерге жиналған көпшіліктің көкірегі әлі күнге дейін шер мен мұңға толып тұрса да, осы бір кітаптың жарық көргені жүздеріне нұр сыйлап, көңілдеріне шуақ шашты.
Қоғам белсендісі Кұндызай Хасанова Жолан Омаровтай жаны жайсаң жомарт жанның атқарған жұмыстары мен парасаттылығын егіле еске алды.

Ал, аяулы әпкесі Ләззәт Омарова көптің ықылас-пейілдеріне сүйсіне қарап, «Бауырымның артында жақсылығын жарыса айтатын осыншама халқы тұрғанда, ол әлі де тірі екен, өлмеген екен», — деген жүрекжарды ықыласы мен алғысын білдірді.

Өз кезегінде сөз алған аудандық «Мәдениет және тілдерді дамыту» бөлімінің басшысы Фарида Бегенбаева: «Жолан мемлекеттік тілдің мәртебесін өсірді, жиналыстар мен іс-қағаздардың барлығы ана тілімізде жүргізілуін талап етті, сонымен қатар ол мемлекеттік қызметкердің имиджін қалыптастырды. Алдағы уақытта аудан көлемінде мемлекеттік қызметкерлер күніне орай мемлекеттік қызметкерлердің имиджін арттыру мақсатында «Жолан» байқауын ұйымдастыру қажет», — деген ұсыныс білдірді.