Төрт құбыламыз түгенделе берсін

1991 жылы 18 қарашада шетелдегі қандастарды елге көшіру туралы ҚазССР үкіметінің қаулысы қабылданды. Содан бері 30 жыл өтті. Өткеннен осы аралықтағы қазақ көшінің айтары мол екендігі даусыз. Атап айтар болсақ, осы уақыт ішінде елімізге 1 мил¬лионнан аса қандасымыз көшіп келген екен. Соның ішінде Талғар ауданына 2019 жылы 209 қандасымыз көшіп келсе, 2020 жылы бұл көрсеткіш біршама өсіп, 324-ке жеткен. Келушілердің басым көпшілігі көрші Қытай Халық Республикасынан. Бірақ бұған көңіл толады деп айту қиын. Себебі бір жылдан аса әлемді әбігерге салған пандемияның көші-қон мәселесіне де кесірі тигені бар. Дүниежүзі қазақтар қауымдастығының Алматы облыстық филиалының Талғар бөлімінің басшысы Ноғай Жақия осы жөнінде өз ойын былай сабақтайды:

– Жалпы қандастар мәселесін қазақ қоғамындағы өзекті тақырыптардың бірі деп айтуымызға толық хақымыз бар. Қазақстан – шеттегі қандастарын шақырып жатқан әлемдегі санаулы елдің бірі.
Алыс-жақыннан келген ағайындардың шығу тегін, тарихын, басынан өткерген қоғамдық оқиғалары мен қазіргі әлеуметтік жағдайларын зерделеу арқылы отандастарымыздың елге, жерге тез бейімделуде, тұтас мемлекеттің саяси тұрақтылығын одан әрмен нығайта түсуде Дүниежүзі қазақтар қауымдастығына бағынатын біздің бөлімшенің де атқарған қызметі орасан. Елге оралған ағайындар қоғамның әр саласында белсенді еңбек етіп жүр. Жалпы оралман мәселесін тізер болсақ, басты мәселелер деп құжат рәсімдеу, өңірлерге орналастыру және ортаға бейімдеу, баспана және жұмыспен қамту, білім беру, денсаулық сақтау мен емделу, әлеуметтік жеңілдетілген көмектерді айтуға болады. Бүгінде мұның бәрі бірізділікке түсті деп айта аламын.