Ізгі ниет – қоғамға қызмет

Қоғамдық келісім кеңесінің қызметі мен жасап жатқан жұмысы бір-біріне ұқсамайды.Ассамблеяның негізгі қызметін атқарып отырған қоғамдық келісім кеңестері бүгінде қоғамымыздағы келелі істерді шешуде маңызды үлес қосып келеді. Ассамблея жанынан құрылып ақсақалдар, әкелер, аналар, әйелдер, жастар кеңестері басын қосып, жұмыла жұмыс істеуді қамтамасыз етуде. Кеңес қызметі қоғамдағы әртүрлі әлеуметтік топтарды, мемлекеттік емес ұйымдарды қоғамдық келісім мен ұлттық бірлікті құру мен күшейту үрдісіне тартуға, қоғамның тұрақты дамуын қамтамасыз етуге, әлеуметтік және басқа да мәселелерді шешуге атсалысуға, қайырымдылықты, бітімгершілікті-медиацияны, делдалдықты және қоғамдық басқару жүйесін дамытуға бағытталған. Осынау кеңестердің барлығы «Қоғамдық келісім кеңесі» деген атаумен қоғамдағы кез келген салада қордаланған мәселені шешуге бағытталған. Атаулы шаралардың барлығы бүгінде азаматтық қоғамның дамуына ықпал етіп, халықтың пікірі мен ұсыныстары Кеңестер арқылы айтылып, шешімін табуда.

Қоғамдық келісім кеңестерінің мүшелері де қоғамда беделі бар, айтары нақты, сөзі өтімді тұлғалардан сайланып, татулық пен тұрақтылықтың сақталуына жергілікті билік өкілдерімен бірге етене қызмет етеді. Бүгінгі күні жергілікті атқарушы билік өкілдерінің Қоғамдық келісім кеңестерімен санасатынын да байқап отырмыз. Демек, бұл Кеңестердің айтары барын, халық атынан сөйлеуде, салмақты ой айтуда орны барын, беделінің артып келе жатқанын аңғартады.

Талғар ауданының Қоғамдық келісім кеңесінің төрайымы Жұмағыз Бұтабаева да қоғамда өз беделі бар, ел игілігі үшін еңбегі сіңген, өзіндік абыройы бар жан. Әлемді жайлаған індет біздің ауданды да айналып өтпегені көпке мәлім. Осындай қиын-қыстау кезде атқарған қайырымдылық шараларын ерекше атап өтуге болады. Жалғыз басты аналарға, ардагерлерге және көпбалалы отбасыларына үнемі азық-түлік себеттерін апарып, шағын дүкендердің сатушыларына бетперделер және әлеуметтік жағдайы төмен, аз қамтылған отбасыларға сырт киімдер таратып, жалғыз басты қарттарға, мүмкіндігі шектеулі азаматтарға мүмкіндігінше қайырымдылық көмек ұйымдастырып, насихаттау жұмыстарын жүргізді.

— Биылғы пандемияның салдарынан аудан, облыс көлемінде өтетін форумдар мен кең ауқымды іс-шараларды өткізу тоқтатылды. Дегенмен, өткен жыл «Еріктілер жылы» деп жарияланғандықтан қайырымдылық марафондарына көбірек күш салдық, өйткені көп отбасы табыс көздерінен айырылды, тұрмыстық жағдайлары төмендеді, — дейді жомарт жүректі жан.
Өз ісіне үлкен жауапкершілікпен қарайтын, жүрегі мейірімге толы, қиындықта көмек қолын соза білетін Жұмағыз Әшімбекқызының пандемия кезінде халық қамы үшін жасаған еңбектері еленіп, жақында облыс әкімі Амандық Баталовтың «Алғыс хатымен» марапатталды.