Тәртіп сақшылары – қоғамымыздың айнасы. Олар халықпен жұмыс істейтін адамдар. Халыққа жақын болып, азаматтар құқықтарының бұзылмауына себепші болатын жандар. Бүгінде полиция қызметкерлері арасында заң нормаларын дұрыс қолдана білмейтін, құқықтық сауаты төмен, өз лауазымын асыра пайдаланатын мамандар көбейіп кетті. Әсіресе, жол полициясы қызметкерлерінің арасында жемқорлықтың жетегінде кетіп жататындары баршылық. Сол себепті халықтың полицияға деген сеніміне селкеу түскен. «Бір қарын майды бір құмалақ шірітеді» дегендей, полицияның халық алдында беделін түсіретін де осындай қызметкерлер. Десек те, өз қызметін адал атқарып, жүргізушілер мен жүргіншілердің қауіпсіздігін сақтауда тыным таппай еңбек етіп жүрген парасатты полицейлер де баршылық. Қызметтік міндетін дұрыс және жауапкершілікпен атқара білген полиция қызметкерлерін ғана парасатты полицей дей аламыз. Міне, сондай парасат иелерін бүгінде ортамыздан кездестіріп отырмыз. Ауданымыздағы полиция басқармасының жергілікті полиция қызметі бөлімінің патрульдік полиция ротасының полиция аға сержанты Есбол Ережепов пен қатардағы үйренуші Жандос Жасабаевтың қызмет бабындағы кісілігі мен кішілігі қала тұрғындарының көңілінен шығуда.
Жуырда газет редакциясына қала тұрғыны, Дүниежүзі қазақтар қауымдастығының Алматы облыстық филиалының Талғар бөлімінің басшысы Жақия Ноғай екі азаматтың атына мақтау айтып, ризашылығын білдіре келген еді. Қала ішіндегі көлік кептелісінде тұрған азамат кептелістің не себепті орын алғанын білгісі келген екен. Сөйтсе, Қонаев пен Бокин көшелерінің қиылысында бір көлік бұзылып тұрған көрінеді. Сол мезетте әбігерге түсіп жатқан жүргізушіге қызмет бабында жүрген полицейлер көмекке келіп, бір демде көлігін жолдың шетіне шығарып, жүргізушілерге жол ашқан. Бұзылып тұрған көлік иесіне қолынан келгенше көмек беріп, әрі қарай қызметтеріне кіріскен. Күнделікті күйбең тірлікте жол бойында түрлі жағдайлардың куәсі болып жүрген азаматқа екі полицейдің қарапайым ғана іс-әрекеттері зор әсер қалдырған. Бірінші кезекте қос полицейдің қарапайымдылығы мен адамгершіліктері қуантқан. Мамандардың қызметіндегі білімді де біліктілігі, жүргізушілермен дұрыс қарым-қатынас жасауы, дер кезінде шешім қабылдай алуы тәнті еткен. Дана халқымыз: «Ұлық болсаң, кішік бол» деп бекер айтпаған. Полиция қызметінде күнделікті кездесіп отыратын түрлі оқиғалардың ішіндегі ең қарапайым жағдайдың өзі көлік тізгініндегі азаматтардың жүрегіне жылылық ұялатып жатса, бұдан да қиын оқиғаларда өмір мен өлімнің арасынан құтқару шараларын жүзеге асырып, жан беріп, жан алысатын қиын сәттерде адал қызмет атқарып, адам өміріне араша түсетін полицейлердің арқалаған жүгінің қаншалықты ауыр екенін сезінгендей боласың. Қарауындағы мамандарға дұрыс жол сілтеп, оларды кішіпейілдікке, әрбір әрекеттерін ақылға салуға тәрбиелеп келе жатқан Талғар аудандық полиция басқармасының жергілікті полиция қызметі бөлімінің патрульдік полиция ротасының командирі, полиция подполковнигі Дулат Есікбаевтың да біліктілігінің нәтижесі бұл. Қарапайым халықтың назарына ілінген полицейлер Есбол Ережепов пен Жандос Жасабаевтай парасатты азаматтарымыздың қатары көбейіп, елдің алғысына бөлене берсін дейміз біз де.
Перизат Нұрқаева,
«Талғар».
