ҰЛТТЫҚ РУХТЫҢ АЙШЫҚТЫ МЕРЕКЕСІ
Республика күні – халқымыздың азаттыққа ұмтылған асыл арманы мен тәуелсіздік жолындағы тарихи таңдауының символы. Бұл мереке – елдігімізді айшықтап, бірлігімізді бекемдейтін, мемлекетіміздің болашағына деген сенімімізді нығайтатын ерекше күн. Оның мәні мен маңызы тереңде жатыр. Өйткені 1990 жылғы 25 қазанда Қазақ КСР-інің мемлекеттік егемендігі туралы Декларация қабылданып, Қазақстанның тәуелсіз мемлекет ретінде қалыптасуына жол ашылды. Бұл тарихи құжат халқымыздың өз тағдырын өзі айқындауға деген ұмтылысын айқын көрсетті.
Егемендік – ата-бабамыздың сан ғасырлық арманы, ұрпаққа аманат болған ұлы мұрат. Қазақ халқы азаттық жолында талай қиындықты бастан өткеріп, елдігі мен жерін сақтап қалу үшін күресті. Бүгінгі бейбіт өміріміз бен тәуелсіздігіміз – сол күрестің, төгілген тер мен көрсетілген табандылықтың жемісі. Сондықтан Республика күні бізге өткен тарихымызды құрметтеп, бүгінгі жетістіктерімізді бағалап, келешек алдындағы жауапкершілігімізді терең сезінуді міндеттейді.
Тәуелсіз Қазақстан бүгінде әлемге танылған, өзіндік даму жолы бар, халықаралық қауымдастықта лайықты орны қалыптасқан мемлекет. Елімізде білім беру, денсаулық сақтау, мәдениет, ғылым, экономика және басқа да маңызды салаларда ауқымды жұмыстар атқарылып келеді. Жасампаздыққа ұмтылған халқымыздың еңбегі мен бірлігінің арқасында көптеген жетістіктерге қол жеткіздік. Әрине, алда атқарылар іс те, бағындырар белес те аз емес. Ең бастысы – ел болашағына деген сенімімізді жоғалтпай, ортақ мақсат жолында жұмыла еңбек ету.
Мемлекеттің басты байлығы – оның халқы. Ал елдің өркендеуі әр азаматтың жауапкершілігіне, адал еңбегіне және туған жеріне деген сүйіспеншілігіне байланысты. Қай салада еңбек етсек те, еліміздің дамуына үлес қосу – баршамызға ортақ міндет. Жастардың сапалы білім алып, бәсекеге қабілетті маман болып қалыптасуы, үлкендердің өнегесі мен ұрпақтар сабақтастығының сақталуы – жарқын болашақтың кепілі.
Республика күні – ел ішіндегі татулық пен қоғамдық келісімнің қадірін ұғындыратын мереке. Қазақстан – түрлі ұлт пен ұлыс өкілдері ортақ шаңырақ астында тату-тәтті өмір сүріп жатқан мемлекет. Бірлігімізді сақтап, өзара құрмет пен сенімді нығайту арқылы ғана қуатты елге айнала аламыз. «Бірлік бар жерде – тірлік бар» деген халық даналығының мәні де осында.
Туған жерге деген сүйіспеншілік Отан алдындағы жауапкершіліктен басталады. Еліміздің әрбір жетістігіне қуанып, әрбір мәселесіне бейжай қарамай, қоғам игілігі үшін еңбек ету – нағыз азаматтық ұстаным. Тәуелсіздігімізді тұғырлы, егемендігімізді баянды ету үшін заңды құрметтеп, адалдықты ту етіп, келер ұрпаққа жарқын болашақ қалдыруға тиіспіз.
Осы айтулы мереке күні баршаңызға зор денсаулық, отбасыларыңызға амандық, шаңырақтарыңызға шаттық пен береке тілеймін! Әрбір үйде қуаныш пен молшылық орнап, әрбір азаматтың еңбегі жемісті болсын!
Еліміз тыныш, жұртымыз аман, бірлігіміз бекем болғай! Көк байрағымыз көкте желбіреп, Қазақстанның абыройы асқақтай берсін! Тәуелсіздігіміз мәңгілік, егемендігіміз еңселі, болашағымыз жарқын болсын!
Жасай бер, жайнай бер, Қазақстан!
25 қазан – Республика күні құтты болсын!
