Алматы қаласындағы № 146 мектепте әлеуметтік педагог ұлын қорғаймын деп өз отбасымен бірге мектеп оқушысын ұрып тастаған. Бар мәселе екі жеткіншектің WhatsApp желісінде сөзге келіп қалғанынан туындапты. Ал қазір ауруханада жатқан баланың анасы Евгения кінәлілер жазаланғанын қалайды деп хабарлайды Нұр.кз 31 арнаға сілтеме жасап.
Оқиға 24 қыркүйек күні орын алған. Педагогтың ұлы мен Арнұр Мақсатұлының желіде ерегісіп қалғанын білген мектеп басшылығы екіншісін өз кабинетіне шақырыпты.
Арнұрдың анасы Евгенияның сөзінше, баласының ауырып тұрғанын көрген мектеп ұстазы оны «актерге» балаған. Ал мектеп басшылығы тіпті жедел жәрдем мен полиция шақыруға рұқсат бермеген көрінеді.
«Біз келгенше балаға ешкім көмек көрсетпеген. Жедел жәрдем шақыртпаған. Біз полицияға шағымданамыз дегенде, бізді мектептен шығармай қойды»,- дейді Арнұрдың анасы Евгения Қожалымова.
Қазір Арнұр Мақсатұлы аурхунада жатыр. Дәрігерлердің айтуынша, балада жабық ми жарақаты мен түрлі жаралар бар.
Ал өз ұлына болысып, өзге оқушыны соққыға жыққан әлеуметтік педагог Шынар Ілиясқызы сұхбат беруден үзілді-кесілді бас тартқан. Тіпті, оқиғадан кейін де ол баланың анасымен ерегісіп қалыпты.
Ұлының зардап шеккенін айтып шырылдаған ата-ана кінәлілердің әділ жазалануын сұрайды.
Видео: http://informburo.31.kz/7553
Талғар-ақпарат
