Мемлекеттік қызмет – ел мүддесіне қызмет етудің ең жауапты әрі абыройлы салаларының бірі. Сондықтан мемлекеттік қызметшінің беделі мен қоғам алдындағы абыройын сақтау – маңызды міндеттердің қатарында. Осы тұрғыдан алғанда, мемлекеттік қызметшілердің ар-намысы мен қадір-қасиетін кемсітушіліктің және оған қолсұғушылықтың кез келген нысандарын болдырмау – өркениетті қоғамның басты қағидаларының бірі болып табылады.
Қазіргі таңда қоғамда әділдік, заңдылық және өзара құрмет құндылықтарына ерекше мән берілуде. Мемлекеттік қызметші – халық пен билік арасындағы алтын көпір. Сондықтан олардың кәсіби қызметіне құрметпен қарап, жеке басының абыройын қорғау – ортақ мәдениеттің көрінісі. Әрбір азамат мемлекеттік қызметшілермен қарым-қатынас барысында әдептілік танытып, заң талаптарын сақтауы қажет.
Ар-намыс пен қадір-қасиет – адамға берілген ең қымбат рухани құндылықтардың бірі. Мемлекеттік қызметшіні қорлау, кемсіту немесе оның беделіне нұқсан келтіру тек жеке тұлғаға ғана емес, мемлекеттік институттардың беделіне де кері әсер етеді. Мұндай әрекеттер қоғамдағы сенім мен тұрақтылыққа сызат түсіріп, мемлекеттік қызметтің тиімділігіне ықпал етуі мүмкін.
Сондықтан қызметтік ортада қолайлы моральдық-психологиялық ахуал қалыптастыру аса маңызды. Ұжым ішінде өзара сыйластық, әділдік, мәдени қарым-қатынас және кәсіби этика қағидалары сақталған жағдайда ғана нәтижелі жұмыс пен сенімді атмосфера орнығады. Әрбір мемлекеттік қызметші өз міндетіне адал болып қана қоймай, әріптестеріне құрметпен қарап, азаматтармен ашық әрі сыпайы байланыс орнатуы тиіс.
Бүгінде мемлекеттік қызмет саласында әдеп нормаларын сақтау, сыбайлас жемқорлыққа қарсы мәдениетті қалыптастыру және қызметтік этиканы нығайту бағытында жүйелі жұмыстар жүргізілуде. Түрлі түсіндіру кездесулері, семинарлар мен тәрбие сағаттары мемлекеттік қызметшілердің құқықтық сауаттылығын арттырып, қоғамдағы өзара құрмет пен сенімді нығайтуға ықпал етеді.
Қолайлы моральдық-психологиялық ахуал – тиімді жұмыстың және сапалы мемлекеттік қызмет көрсетудің кепілі. Себебі сыйластық пен сенім бар жерде жауапкершілік те жоғары болады. Ал әділдік пен әдептілікке негізделген ортада кәсіби даму мен нәтижелі еңбекке жол ашылады.
Қорытындылай келе, мемлекеттік қызметшілердің ар-намысы мен қадір-қасиетін қорғау – баршамызға ортақ міндет. Әр азамат заңды құрметтеп, қоғамдағы әдеп нормаларын сақтап, өзара сыйластық қағидаларын ұстануы қажет. Сонда ғана біз әділетті, мәдениетті әрі дамыған қоғам қалыптастыра аламыз.
Меруерт Мубаракова, Талғар ауданының ішкі саясат бөлімінің басшысы