«Көктал Агро» жауапкершілігі шектеулі серіктестігі көпсалалы кешен. Бір ай бұрын өндіріс орны 1150 басқа арналған сүт фермасын іске қосты. Қазіргі уақытта мұнда 160 бас сиыр сауылып отыр, деп хабарлайды «JETISÝ MEDIA» ақпараттық алаңы.
Күніне майлылығы 4 пайызбен 2600 литр сүт алынып келеді. Өнім алу кезінде ферма 40 орынға арналған немістің «Карусель» сауу құрылғыларын қолданады. Ыңғайлы әрі жұмысшы күшін қажет етпейтін жаңа қондырғы толықтай автоматтандырылған. Тиісінше, жұмыстың барлығы да компьютермен бақыланады. Әр сауылатын зеңгібаба төліне электронды чип орнатылған. Нөмірленіп белгіленген әр сиырдың күнделікті салмағы, рационы, қанша литр сүт бергені жөнінде ақпарат шығарылып отырды. Сондай-ақ, олардың түрлі аурулардан амандығын да тексеруге мүмкіндік бар. Алынған өнімдер Талдықорған қаласындағы «JLC сүт» серіктестігіне өткізіледі. Жұмысын жаңа бастаған өндіріс орнында 31адам еңбекпен қамтылған. Серіктестік басшысының айтуынша, өндіріс орны жыл соңына дейін тағы асыл тұқымды 180 баспен толықпақшы.
-Біздің жобаның іске асыру межесі 2021 жылға дейін. Бүгінгі күні бұзауымен қосқанда 600 бас сиыр өсіріліп жатыр. Келер жылы толығымен жобаны жүзеге асырсақ 1150 бас болады. Оған қоса кешенде 240 сиыр ұстайтын орын әзірленуде. Олардың азығы, жем-шөп барлығы өзімізден. Болашақта еліміздегі мал шаруашылығы көкжиегінің кеңейе түсерін көрсеткіміз келеді,- деді жоспарымен бөліскенде Жәнібек Оханов.
Көктал ауылында іске асырылып отырған жоба құны 2,5 млрд.теңгені құрайды. Жалпы, «Көктал Агро» жауапкершілігі шектеулі серіктестігі 2004 жылы жұмысын бастаған. Бүгінге дейін ауданда алғашқы болып егістікте тамшылатып суару әдісін пайдаланды. Қазіргі күні иелігінде 1000 гектардан астам жері бар. Ұжымның алдағы бір жоспары сүттен кілегей, сарымай, қатық, құрт, сықпа өнімдерін шығару. Оған дайындық жұмыстарын бастап та кетті.
Талғар-ақпарат
