Bek Air ұшағының апатына байланысты Роман Скляр оқиғаның мән-жайын айтты(видео)

Үкімет басшысының орынбасары Роман Скляр Bek Air ұшағының апатқа ұшырауы оқиғасының мән-жайын айтты, — деп хабарлайды ТалғарАқпарат.

Ол зардап шеккен азаматтар мен қаза тапқан отбасылардың туыстарына барлық көмек көрсетілетінін айтты. Ешкім ескерусіз қалмайды, деді.

«Үкіметтік комиссия жұмысына кірісті. Бүгін біз ұшу-қону жолағында әуе кемесінің артқы бөлігінің ұшу-қону алаңына 300-400 метр аралықпен екі рет жанасқанын байқадық. Сосын әуе кемесі оңға бұрылды, ол кезде шасси алынған еді, әуе аппараты ұшпақ болған. Өздеріңіз байқағандай, ол қоршауға соқтығысып барып, жеке үйге кіріп кеткен. Үйде ешкім болмаған. Әуе кемесі екіге бөлініп қалды, негізінен алдыңғы бөлігінде отырған жолаушылар қаза тапты. Құтқару жұмыстарына 1000 адам, 33 жедел-жәрдем көлігі мен 72 техникалық көлік жұмылдырылды. Бортта 93 жолаушы мен 5 экипаж мүшесі болған. Оның ішінде 2 Украина азаматы, 1 Қырғызстан азаматы, 1 ҚХР-ның азаматы болған», — деді Роман Скляр Алматыдағы баспасөз конференциясында.

Сондай-ақ, ол алдын ала әуе апатының себебін былай түсіндірді: «Бұл не ұшқыштың қателігі болуы мүмкін, не техникалық ақау».

Роман Склярдың айтуынша 12 адам қаза тапқан. Оның 8-і оқиға орнында көз жұмса, 2-уі ауруханада ал қалған 2-уі Алматы қаласындағы аэропортта қайтыс болған. Қаза тапқандардың ішінде әуе кемесінің командирі Марат Мұратбеков та (1961) бар. Тәжірибелі командир болған, дейді Роман Скляр. Екінші пилот өте ауыр жағдайда, ауруханада жатыр.